luis-mini
Gennaio 2016 
Il sole e il caldo, tutto quel tempo di attesa, e… quel pizzico di eroico protagonismo, che tutti in fondo in fondo, una volta nella vita, pensiano di meritarci, ed ecco… “el bodyguard” de Lina. … 

 

 

 

Per leggere tutto il post clicca sull'immagine a lato oppure qui

  

… Se poi la cliente la te par la Sofia Loren… son pronto a scommettere che anche tu ti saresti comportato come il nostro Luisin. Ti lascio con un altro racconto dei suoi, sicuro che alla fine, sorriderai come lo sto facendo io, e avresti detto: lassa faa de mi… Sofia. 


foto  

Sul fil di centrenta a l’ora

A l'aeroporto de Linaa ona corsa l'è semper sicura, domà che bisògna avegh la santa pasienza de spettà in fila che vègna el nòster moment.

Quell dì là del mes de luj, ai dò or de podisnà se s'cioppava de la gran calura. Mì pisorgnavi in macchina cont avert el ventilador e dent per dent, per passà el temp, ghe davi on' oggiada a ona rivista che gh'era sù la stòria, cont i fotografii, de la gran rapina di gioiej de la Sofia Loren. Quand in sul pù bell... hoo vist a vegnì inanz ona sciora alta, splendida, vestida de bianch a la marocchina, con trii gir de cadèna dòra intorna al còll; me sont dimandaa se seri anmò indormentaa o se l'era pròpi lee, la Sofia, vegnuda appòsta de Paris per cattà foeura el me tassi.

Ma l'era minga la Sofia, l’era vona appèna rivada con l'aeroplano de Londra che la parlava nò l'italian... son riussii a capì domà dò parolitt ma eren assee. “Hotel Gallià”

Giri la ciavetta del motor e son lì per partì; in quella me fann “alt” con la man duu malnatt. Vun a destra del tassi con la barba, e vun de manzina cont i barbis che ghe vegneven giò fina a la basletta. Mì, che in sul mestee, foo nò per dì, son vun de quei lughii... in d'on lamp me rendi cunt che in duu drogaa e che hann filaa la Sofia... cioè l'inglesa per scarpagh via la cadèna... schisci l'accelerador intanta che lor cerchen de dervimm i portèr, e la sciora la trà là di gran sgar per el spavent. A tutta bira passi el semaforo cont el ross (Necessità non conosce legge, me diseva semper el Pagett che l'era el nòster -capo mestiere-) e infili de volada el Forlanin.

Ma la donna la se calmava nò, la seguta agitass e vosà... e già... la gh'aveva  reson...  guardi in del retròvisor e me rendi cunt che me corr adree ona gròssa cilindrada. Si oej... hann pròpi trovaa quell bon 'sti delinquent... ma quand a gh'è on tassista al volant gh'è nanca el Padreterna che l'è bon de sorpassall.

Semm giamò sul fil di centrenta a l'ora con la dònna che la vosa semper de pù, quand sòna la sirena de la Polizia, rallenti. La machina di banditi la và via per sò cunt che l'è on piesè, e ona “Pantera” la me passa denanz e la me taja la stada per travers. Ven giò on brigadier cont el mitra in man.

"Tassista... cosa hai combinato?”

“Combinato?... Meno mal che sii rivaa in temp... ma lor però hinn scappaa...”

“Chi loro?”

“Ma lor... i rapinador... nò!”

Rapinatori?... Rapinatori non ne abbiamo visti... per caso non ti avrà dato alla testa il caldo?”

“Ma cossa el dis scior brigadier?... Basta guardà come l'è consciada che la pòvera sciora chì. La se tirada adòss perfina i convulsion!”

La sciora però la capiva ona sverza de quell che disevom nun, e altertant nun de quell che la diseva lee. Mi seri lì a mandà giò cadèn. Avegh i rapinador a portada de man!... e pròpi lor che hinn de la pola i lassen scappà, e per gionta vorarissen famm passà per matt! Ròbb de ciòd! Seri 'dree per dighen quatter ma el brigadier el fà:

“Si comprende soltanto dai gesti che la signora vuol tornare all'aeroporto”

El se mett denanz sul tassi al mè fianch e see torna indree con la “Pantera” a roeuda, mitra spianaa.

De distant vedi che sul piazzal de l'aeroporto hinn lì fermi ancamò i duu drogaa e salti sù a digh al brigadier:

Ecco ecco! El ved se gh'avevi minga reson! Hinn lor... hinn lor...”

Ma chi loro?”

“Ma i duu drogaa!... el ved nò?... vun con la barba e l'alter cont i barbis!”

Ah... ma tu dici quei due signori con le valige lì per terra al fianco?”

“Pròpi, pròpi...”

Ma non vedi che sono due viaggiatori che aspettano qualcuno: magari un tassi...” 

Minga content, allora foo mì la part del brigadier. Salti giò del tassi e ghe voo arent cont ona mutria scura scura... de fà pagura.

“No facchin gott... draiver” Disen.

“Ah sì?... facchin gott... draiver, per intanta sarii voialter duu... oh brutta razza de bastardi...”

E quell de la barba, che l'era el pussee rabbiaa, ghe sbragia al brigadier:

Essere lui il tassista... essere lui il tassista rapitore di mia moglie... essere lui! “

Ciombia! L'era el marì! E quell alter cont i barbis el fradell de la mia clienta, che seren fermaa indree per ritirà i valis intanta che lee la cercava el tassi.

Staven per saltamn adòss ma duu de la pola hann faa in temp a mettes in mezz, se nò saria stà on sfragell.

Forsi gh'aveven reson lor, ma nanca mì gh’avevi minga tòrt... cont i temp che corr... On poo de colpa l’era anca de la Sofia Loren che la m'ha miss in surbuj i scinivej... vorevi di la marocchina... insòma dell’inglesina vestida de marocchina che la metteva in bella mostra i trii gir de cadèna dòra e on quei còss d'alter.

Hann ciamaa on alter tassi e hinn andaa via che barbottaven:

“Tutti banditi... draiver italiani...”

Va a faghela capì se te se bon! Son tornaa a mettom in fila per spettà di alter client intanta che i me collega cont i clandestin e quei de la pola se tegneven la panscia per el gran rid.

Quest, l'è quell che se vanza on pòver tassista, quand ghe la mett tutta per salvaguardà la clientèla dai gabol de certi scorlacoo del dì d'incoeu che viven senza fà tròppa fadiga.

 

... e s'ciavo!