anita003
7 de agost 2017   
L’è rivada domà ier...

 

 

 

 

 

 

 

 

… e te 'l disi gianmò incoeu: dissedass l'è pròppi bell, e de penser vegg domà quell.
Anca se l'è on fagottin, l'è fòrta e determinada, quand la caragna la streng i man, ma per fòrza, l'è de Milan. Hoo ghignaa quasi de crepà, quant hoo savuu che la mama l'ha tegnuu tutta nòtt dissedada, cont ona bella caragnadina, (logicament con cadenza meneghina).
E per còsa? Inscì, per nient, figures tì la gh'ha nanca i dent.

'Sto fagottin long ona spanna (51 cm e 3.100 gr) l’è 'dree a fasnn pirlà, in gir ,in brascia al sò papà, adess... l'è in 'del  corridor de la Mangiagalli, doman la sarà in del TAXI fina in piazza Novelli.

Ma… l’è ona delizia che auguri a tucc, tucc quèi che cont i telefonad, i messagg me l'hann cuntaa, con dolcezza e sentiment, m’hann dimostraa quanto me voeuren ben.
Quanto partecipen a la nòstra felicità, anca se ancamò la gh'ha de comincià.

Caio rattin... el tò nòno Ivo (che effett che me fa!!!)

Perdona questa "follia" è stata la felicità della novità e un'allegria tutta mia. smile25x3


L’affetto e la vicinanza sono arrivate anche in rima, dalla amica Paola Cavanna.
Ecco la sua poesia per Anita.

 

 


Benvegnuda Anita!

di Paola Cavanna

L’è rivada, l’è rivada
finalment la biadeghina!
L’ha faa a svelt, la s’è impegnada
a mett foeura la crappina

Bianca e ròsa ‘me on benis
coi didin ‘me ‘na pianista
e gianmò cont el sorris
de sirèna che conquista

I sò gent hinn orgoglios
de ‘sta dolza piggottina
E ‘l sò nòno l’è brios…
… el par fin vess in gaina!

E dal ciel, sora ona stella
i bisnòni batt i man
Dòpo tant, ‘na tanascella
milanesa de Milan!

 


Anche la Micaela Baciocchi ha avuto un pensiero per la... già nostra Anita, che ha scritto in versi, eccolo.
Grazie Micaela.

Anita

di Micaela Baciocchi

 

Te portet el nòmm

de la bella eròina garibaldina.

Nòmm important

per ‘na tosa inscì piscinina.

Bèlla in de l’aspètt ,

semm chì a scoltà

I tò primm versètt!

De ‘na robba semm sicur ,

vist che te see ‘na Leonessa,

te sfidaree la vita con fierèzza

e anca cont on ciccin de dolcèzza.

I auguri che te foo

hinn quèst:

de cress ben e vèss

brava, intelligent

e la giòia di oeugg di tò gent.

Con affètt.

 

  


 

anita001

 

anita002

 

anita005

 

 

 

 

 

 

 

Commenti   

0 #4 Anna Maria 2017-09-19 13:01
Stai proprio bene con in braccio la nipotina!!!
Varda che bella tencina! I nevod hinn pròppi ona grazia del Signor!!!
Complimenti
Anna Maria
Citazione
0 #3 enrica parmigiani 2017-08-09 17:21
l'è pròppi bella! Ivo te ghe de vess orgoglios, lè tutta el sò nòno
Citazione
0 #2 patrizia.chiapparini 2017-08-08 21:20
Che bèlla pigottina la toa biadeghina!
Te saret on nòno coi barbis!
Benvegnuda Anita!
Bèll rattin meneghin
Citazione
0 #1 paola cavanna 2017-08-08 10:24
Ghe voreva pròppi diventà nònò per trà foeura el germoeuj!
Ona "quasi poesia" e tutt in dialett milanes!
Bravo Ivo e grazie Anita!
Te see noeuva e t'hee gianmò portaa bèi novità!
On basin
Paola
Citazione

Aggiungi commento